បច្ចេកទេស ដាំស្ពៃបូកគោ អោយបាន ទិន្នផលខ្ពស់

1.លក្ខណៈទូទៅនៃដំណាំស្ពៃបូកគោ

ស្ពៃបូកគោ (Chinese Cabbage Or Napa Cabbage)មានប្រភពនៅជិតទីក្រុងប៉េកាំង ប្រទេសចិន ។វាមានដើមកំណើត ចាប់តាំងពីសតវត្សទី១៥ នៅទន្លេ ហ្សាំងសឺ(Yangtze River)។ ស្ពៃបូកគោអាចដាំបាន៤ដងក្នុង១ឆ្នាំ

2.ការរៀបចំដី

• រៀបចំថ្នាល/ត្រេបណ្តុះ ដែលមានដីមានជីជាតិល្អ មានលាយល្បាយជីលាមកគោ ឬជីកំប៉ុស្ត និងកម្ទេចស្លឹកឈើងាប់
• រួចស្រោចទឹកឱ្យជោគ និងទុកដីហោលចោលរយៈពេល៧ថ្ងៃ
• ដីមានជីជាតិ(ដីលាយល្បាយលាមកសត្វស្ងួត ឬជីកំប៉ុស្ត)

3.ការបណ្តុះកូន

• មុនយកគ្រាប់ពូជទៅសាប ត្រូវយកគ្រាប់ពូជទៅត្រាំក្នុងទឹកក្តៅឧណ្ឌៗ រយៈពេល២៥នាទី (ជួយធ្វើឱ្យគ្រាប់ឆាប់ដុះ)
• រោយគ្រាប់ពូជនៅត្រេ ហើយរោយដីពីលើថើៗហើយស្រោចទឹក
• គ្រាប់ពូជស្ពៃបូកគោ បើបណ្តុះលើត្រេបណ្តុះ អាចប្រើគ្រាប់ពូជ ពី ៤០០ -៥០០ ក្រាម/ហិចតា
• បើយើងព្រោះវាលើដីវាលអាចប្រើគ្រាប់ពូជដល់ទៅ១ គីឡូក្រាម/ហិចតា
• ត្រូវស្រោចទឹកឱ្យបានទៀងទាត់ ព្រឹកម្តង ល្ងាចម្តង

4.ការដាំដុះ

• កូនស្ពៃក្រោយសាបរយៈពេល ២០ថ្ងៃឡើងទៅ មានស្លឹកពី ៤ ទៅ ៨ សន្លឹក យើងអាចដកយកទៅស្ទូង
• ដាំកូនស្ពៃបូកគោ ពី២៥ -៣០ សម ចន្លោះពីគុម្ភ១ទៅគុម្ភ១ និង ពីរងមួយទៅរងមួយ ចន្លោះ ៤០-៤៥សម
• បើយើងដាំនៅក្នុងគ្រិនហោស អាចប្រើពី ៧០០០០-៨០០០០កូន/ហិចតា
• មុនដកកូនស្ពៃក្តោបបូកគោមកដាំ ត្រូវស្រោចទឹកក្នុងថ្នាលឱ្យសើមបន្ថិចដើម្បីកុំអោយដកមកដាច់ឬស
• ការស្ទូងកូនគួរធ្វើឡើងនៅពេលល្ងាច ត្រជាក់ ដើម្បីកុំឱ្យអន់ដើមនៅពេលត្រូវកម្តៅថ្ងៃ

5.ការថែទាំ

• ត្រូវស្រោចទឹកឱ្យបានទៀងទាត់មួយថ្ងៃ៣ដង ព្រឹក ថ្ងៃត្រង់ និងល្ងាច ក្រោយស្ទូងបានរយៈពេល៣ថ្ងៃ
• ត្រូវឧស្សាហ៍ដកស្មៅ និងជ្រុំដី
• បើនៅរដូវភ្លៀងធ្លាក់ ត្រូវក្រោកស្រោចទឹកពីព្រលឹមឡើង ដើម្បីលាងទឹកភ្លៀងចេញ ព្រោះទឹកភ្លៀងអាចធ្វើឱ្យកូនដំណាំរលួយ

6.ការប្រមូលផល៖

• បន្ទាប់ពីស្ទូងកូនរួច កូនស្ពៃលូតលាស់រហូតដល់អាយុ២ខែ ឡើងទៅអាចប្រមូលផលបានហើយ
• ការប្រមូលផលគឺដោយដៃ ដោយកាត់ស្ពៃកំពស់២,៥ សម ពីដី
• ពេលប្រមូលផលត្រូវបកស្លឹកកំណើតចេញខ្លះដើម្បីបានស្ពៃដែលស្អាតស្រស់
• ស្ពៃបូកគោផ្តល់ទន្និផលបាន ពី ៤-៥ គីឡូក្រាម/ម៉ែត្រការ៉េ ឬពី៤០-៥០តោន/ហិចតា