រូបមន្តផ្សំចំណីជ្រូក ចិញ្ចឹមលក្ខណៈគ្រួសារ -

ដើម្បីទទួលបានជោគជ័យ ក្នុងការចិញ្ចឹមជ្រូក ឆាប់ធំធាត់ល្អ កូនជ្រូកល្អ កត្តាផ្តល់ចំណី មានសារៈសំខាន់ណាស់ ក្នុងការងារ ផលិតកម្មសត្វនេះ។ ក្នុងការចិញ្ចឹមជ្រូកសាច់លក្ខណៈគ្រួសារ ការផ្តល់ចំណី ដែលមានគុណភាពល្អ ជួយឲ្យជ្រូកមានសុខភាពល្អ និងធំធាត់លឿន។ តាមតម្រូវការជីវជាតិ ជ្រូកត្រូវការចំណី ៤ ក្រុមសំខាន់ៗ ដូចជា ចំណីប្រូតេអីន ចំណីថាមពល វីតាមីន សារធាតុខនិជ ទឹក។ ការផ្សំចំណីដែលមានតុល្យភាពនៃក្រុមខាងលើ គឺជួយអោយជ្រូកសាច់ មានសុខភាពល្អ និងលូតលាស់លឿន ។

ដើម្បីជ្រាបកាន់តែច្បាស់ អត្ថបទខាងក្រោម និងបង្ហាញលោកអ្នក ពីវិធីសាស្រ្ត ក្នុងការផលិតចំណីដោយខ្លួនឯង សម្រាប់ការចិញ្ចឹមជ្រូកសាច់លក្ខណៈគ្រួសារ ដូចខាងក្រោម៖

១.ចំណីប្រូតេអីន មានដូចជា ត្រី ម្សៅត្រីឬត្រីស្ងួត ម្សៅសាច់ ម្សៅឈាម កំពឹស គ្រាប់ធញ្ញជាតិសណ្តែកសៀង សណ្តែកបាយ សណ្តែកដី ល្ង គ្រាប់កៅស៊ូ ចកបាយទា ត្រកួន ស្លឹកកន្ធំថេត ផ្ទី

សារៈប្រយោជន៍

ជម្រុញការលូតលាស់ ការបន្តពូជ
ជួយញធ្វើឲ្យឆ្អឹងលូតលាស់ល្អ
ជួយទ្រទ្រង់សុខភាព
ជួយបង្កើតអង់ទីគ័រ និងផលិតអង់ស៊ីមនិងអ័រម៉ូន

២.ចំណីផ្តល់ថាមពល (ម្សៅនិងសារធាតុខ្លាញ់) មានដូចជា មើមដំឡូងមី មើមដំឡូងជ្វា មើមត្រាវ កន្ទក់ ពោត ចុងអង្ករ ខ្លាញ់សត្វ ប្រេង រុក្ខជាតិ កាកដូង កាកសំណល់ផ្ទះបាយ កាកស្ករ ស្ករ កាកស្រាបៀរ បាយស្រា (ដាក់ក្នុងកម្រិតមួយកំណត់)

សារៈប្រយោជន៍៖

ជួយទ្រទ្រង់សុខភាព និងសារពាង្គកាយ
ជួយទ្រទ្រង់មុខងារកោសិកា ក្នុងពេលដំណើរការរំលាយអាហារ
បង្កើន និងរក្សាកំដៅក្នុងខ្លួន ឲ្យមានតុល្យភាព
ផ្តល់កម្លាំងឲ្យសត្វធ្វើសកម្មភាព

វីតាមីន មានដូចជា វីតាមីន ក្នុងរុក្ខជាតិបៃតង ស្លឹកមន ស្លឹកម្រុំ បន្លែស្លឹក រុក្ខជាតិស្មៅ ធញ្ញជាតិ និងដើមរុក្ខជាតិពណ៌លឿង ការ៉ុត ផ្លែឈើទុំ ល្ពៅ ថ្លើមសត្វ សំបកស៊ុត និងខ្លាញ់ត្រី

សារៈប្រយោជន៍៖

ជួយទ្រទ្រង់សុខភាពសត្វ ការពារជំងឺ
ជួយទ្រទ្រង់ ដល់ផលិតកម្ម សាច់ ឆ្អឹង និងការបន្តពូជ
ជួយទ្រទ្រង់ និងការពារមុខងារសរីរាង្គសត្វ ក្នុងការប្រើប្រាស់ និងសំយោគសារធាតុចិញ្ចឹម ពីចំណីអាហារ

សារធាតុខនិជ មានដូចជា ដើមរុក្ខជាតិបៃតង ម្សៅត្រី ម្សៅឆ្អឹង ម្សៅទឹកដោះគោ សំបកខ្យង ខ្ចៅ គ្រុំ ងាវ ក្តាម អំបិល

សារៈប្រយោជន៍៖

ជួយធ្វើឲ្យឆ្អឹងលូតលាស់ និងជម្រុញដល់ការលូតលាស់សារពាង្គកាយ
ជួយការពារទប់ស្កាត់ជំងឺ ឆ្អឹងបាក់ ជើងទន់ខ្សោយ
ជួយសំយោគ និងស្រូបយកសារធាតុចិញ្ចឹម

ទឹក៖ ទឹកដែលផ្តល់ឲ្យជ្រូកផឹក ត្រូវស្អាត និងមានអនាម័យ

សារៈប្រយោជន៍៖

ជួយសម្របសម្រួល មុខងារសរីរាង្គ
ជួយរក្សាតុល្យភាពភាពកម្តៅក្នុងខ្លួនសត្វ
ជួយបញ្ជូនសារធាតុចិញ្ចឹម ទៅកាន់គ្រប់ផ្នែក នៃសារពាង្គកាយ
ជួយរំលាយអាហារ និងការផលិតទឹកដោះ

ការផ្សំចំណីជ្រូក៖

កូនជ្រូកផ្តាច់ដោះ អាយុ ៤-៩សប្តាហ៍(បរិមាណ១០០គ.ក្រ)៖

ពោត ៥គ.ក្រ
ចុងអង្ករ ៤៩គ.ក្រ
សណ្ដែកសៀង ៣២គ.ក្រ
ម្សៅត្រី ៥គ.ក្រ
សំបកលាស គ្រុំ ខ្យង ខ្ចៅ ងាវ ៣គ.ក្រ
ស្ករស ២គ.ក្រ
ប្រេងឆា ២គ.ក្រ
អំបិល ០,៥គ.ក្រ
ប្រេម៉ិច ០,៥គ.ក្រ

ជ្រូកសាច់៩សប្តាហ៍ឡើង(បរិមាណ១០០គ.ក្រ)៖

ចុងអង្ករ ៥៨គ.ក្រ
កន្ទក់ ២០គ.ក្រ
សណ្ដែកសៀង ១៥គ.ក្រ
ម្សៅត្រី ៤គ.ក្រ
សំបកលាស គ្រុំ ខ្យង ខ្ចៅ ងាវ ២គ.ក្រ
អំបិល ០,៥គ.ក្រ
ប្រេម៉ិច ០,៥គ.ក្រ

មេជ្រូកនិងជ្រូកបា(បរិមាណ១០០គ.ក្រ)៖

ចុងអង្ករ ៥០គ.ក្រ
កន្ទក់ ៣០គ.ក្រ
សណ្ដែកសៀង ១៣គ.ក្រ
ម្សៅត្រី ៤គ.ក្រ
សំបកលាស គ្រុំ ខ្យង ខ្ចៅ ងាវ ២គ.ក្រ
អំបិល ០,៥គ.ក្រ
ប្រេម៉ិច ០,៥គ.ក្រ

ជ្រូកបំបៅដោះ(បរិមាណ១០០គ.ក្រ)៖

ចុងអង្ករ ៥៦គ.ក្រ
កន្ទក់ ២០គ.ក្រ
សណ្ដែកសៀង ១៦គ.ក្រ
ម្សៅត្រី ៤គ.ក្រ
សំបកលាស គ្រុំ ខ្យង ខ្ចៅ ងាវ ៣គ.ក្រ
អំបិល ០,៥គ.ក្រ
ប្រេម៉ិច ០,៥គ.ក្រ

តម្រូវការចំណីទៅតាមប្រភេទជ្រូក៖

កូនជ្រូក៖

កូនជ្រូកបៅដោះ ត្រូវការចំណី ០,៣-០,៤ គ.ក្រ/ក្បាល/ថ្ងៃ
កូនជ្រូកអាយុ ៧ថ្ងៃ-១២គ.ក្រ ត្រូវការចំណី ០,៥-០,៨ គ.ក្រ/ក្បាល/ថ្ងៃ
កូនជ្រូកទម្ងន់ ១២-១៨គ.ក្រ ត្រូវការចំណី ០,៨-១,២ គ.ក្រ/ក្បាល/ថ្ងៃ
កូនជ្រូកទម្ងន់ ១៨-២៥គ.ក្រ ត្រូវការចំណី ១,២-១,៥ គ.ក្រ/ក្បាល/ថ្ងៃ
កូនជ្រូកទម្ងន់ ២៥-៤០គ.ក្រ ត្រូវការចំណី ១,៥-២,០ គ.ក្រ/ក្បាល/ថ្ងៃ
កូនជ្រូកទម្ងន់ ៤០-៦០គ.ក្រ ត្រូវការចំណី ២,០-២,៥ គ.ក្រ/ក្បាល/ថ្ងៃ

បញ្ហាដែលជួបប្រទះ ញឹកញាប់ លើកូនជ្រូក

មេជ្រូក៖

មេជ្រូកក្រមុំ ត្រូវការចំណី ២,០ គ.ក្រ/ក្បាល/ថ្ងៃ
ជ្រូកបា ត្រូវការចំណី ២,០-២,៥ គ.ក្រ/ក្បាល/ថ្ងៃ
មេជ្រូកផើម ត្រូវការចំណី ២,០-២,៥ គ.ក្រ/ក្បាល/ថ្ងៃ
មេជ្រូកបំបៅដោះ ត្រូវការចំណី ២,០-៤,០ គ.ក្រ/ក្បាល/ថ្ងៃ
មេជ្រូកផ្តាច់ដោះ ត្រូវការចំណី ២,៥-៣,០ គ.ក្រ/ក្បាល/ថ្ងៃ

តម្រូវការទឹកទៅតាមប្រភេទជ្រូក៖ កូនជ្រូក៖

កូនជ្រូកបៅដោះ ត្រូវការទឹក ០,២-០,៤ លីត្រ/ក្បាល/ថ្ងៃ
កូនជ្រូកអាយុ ៧ថ្ងៃ-១២គ.ក្រ ត្រូវការទឹក ១-២ លីត្រក្បាល/ថ្ងៃ
កូនជ្រូកទម្ងន់ ១២-១៨គ.ក្រ ត្រូវការទឹក ២-៣ លីត្រ/ក្បាល/ថ្ងៃ
កូនជ្រូកទម្ងន់ ១៨-២៥គ.ក្រ ត្រូវការទឹក ៣-៤ លីត្រ/ក្បាល/ថ្ងៃ
កូនជ្រូកទម្ងន់ ២៥-៤៥គ.ក្រ ត្រូវការទឹក ៤-៦ លីត្រ/ក្បាល/ថ្ងៃ
កូនជ្រូកទម្ងន់ ៤៥-១០០គ.ក្រ ត្រូវការទឹក ៦-១០ លីត្រ/ក្បាល/ថ្ងៃ

មេជ្រូក៖

មេជ្រូកក្រមុំ ត្រូវការទឹក ១០-១៥ លីត្រ/ក្បាល/ថ្ងៃ
ជ្រូកបា ត្រូវការទឹក ១៥-២០ លីត្រ/ក្បាល/ថ្ងៃ
មេជ្រូកផើម ត្រូវការទឹក ១៥-២៥ លីត្រ/ក្បាល/ថ្ងៃ
មេជ្រូកបំបៅដោះ ត្រូវការទឹក ៣០-៤០ លីត្រ/ក្បាល/ថ្ងៃ

ចំណាប់អារម្មណ៍៖

តាមរយៈអត្ថបទខាងលើនេះ មានប្រយោជន៍ណាស់ សម្រាប់អ្នកដែលស្រលាញ់សត្វ ចង់ចិញ្ចឹមសត្វ ក៏ដូចជា ចង់ចិញ្ចឹមជ្រូកដោយខ្លួនឯង អាចមើលពីបច្ចេកទេសសាមញ្ញៗ ដើម្បីផ្តល់ចំណីឲ្យជ្រូកឆាប់ធំធាត់ ដោយផ្សំ ចំណីដោយខ្លួនឯង ចំណាយតិច ។ ការចិញ្ចឹមជ្រូកជា លក្ខណៈគ្រួសារ អាចជួយផ្គត់ផ្គង ការហូបចុកប្រចាំថ្ងៃ និងជាមុខរបរមួយ ជួយបង្កើតឳកាសការងារ និងបង្កើនប្រាក់ចំណូលសម្រាប់គ្រួសារបានមួយផ្នែក។