អ្នកទាំងអស់គ្នា ធ្លាប់ទទួលទាន ចេកពងមាន់ ដែលឬទេ? តើអ្នកចូលចិត្ត ក្លិនដ៏ឆ្ងុយឆ្ងាញ់ របស់វាទេ? ប្រជាជនយើងជាច្រើន ចូលចិត្តទទួលទាន ចេកពងមាន់នេះ ។
យើងនិង លើកយកពីអត្ថប្រយោជន៍របស់ ចេកពងមាន់ និងបច្ចេកទេសដាំដុះ របស់វា មកចែករំលែកចំណេះដឹង ដល់អ្នកទាំងអស់គ្នា!
មិនត្រឹមតែមានរសជាតិផ្អែមឆ្ងាញ់ និងក្លិនឆ្អុយ គួរឲ្យទាក់ទាញប៉ុណ្ណោទេ ចេកពងមាន់ ត្រូវបានគេទទួលស្គាល់ពីអត្ថប្រយោជន៍ជាច្រើនរបស់វាផងដែរ ដូចជា៖ ជាផ្លែឈើ ជាឱសថដ៏សក្តសិទ្ធិ ក្នុងការព្យាបាលរោគជាច្រើនដូចជា ជម្ងឺទល់លាមក រលាកក្រពះ រលាកពោះវៀន ក្អួតចង្អោរ ខ្វះឈាម ធាត់ ជម្ងឺធ្លាក់ទឹកចិត្ត ជម្ងឺបេះដូង និងជម្ងឺផ្សេងៗមួយចំនួនទៀត ។
ផ្លែចេកពងមាន់ ក៏អាចជួយបង្កើននូវសំណើម នៅលើស្បែក អោយស្រស់ស្អាត បំបាត់ស្នាមជ្រីវជ្រួញ និងជួយបំបាត់ស្នាមអុជខ្មៅ នៅលើស្បែក ។ សម្បករបស់វា ក៏អាចជួយបន្សាបការឈឺចាប់ រោល ឬ ហើម ពេលមានសត្វល្អិតទិច ឬ ខាំផងដែរ ដោយគ្រាន់តែយកវា មកញីពីលើកន្លែងដែលរបួស។
ក្រៅពីនេះ គល់ចេកពងមាន់ ជាប្រភពជាតិម្សៅ ( អាមីដុង) ដើមវាអាចហាន់ជា ចំណីជ្រូក គោ ក្របី ធ្វើជាខ្សែចំណងផ្សេងៗ ធ្វើជាបាយសី ក្នុងពិធីសែនព្រេននានា ។ បន្ថែមពីលើនេះ ស្លឹកប្រើ ជាសម្ភារៈវេចខ្ចប់ នំចំណី និងត្រយ៉ូង អាចធ្វើជាបន្លែស្រស់ ឬស្លជាដើម។
តោះមកដឹង ពីបច្ចេកទេសដាំដុះ ចេកពងមាន់ទំាំងអស់គ្នា
ការរៀបចំដីដាំ៖
- រៀបចំដី ភ្ជួរចំនួន ៣សា និងរាស់ ១សា
- ភ្ជួរលើកទី១ បន្ទាប់ពីប្រមូលផលដំណាំចាស់រួច
- ៧ថ្ងៃក្រោយមក ធ្វើការភ្ជួរលើកទី២ និង ៧ថ្ងៃក្រោយទៀត ទើបភ្ជួរលើកទី៣
- ប៉ុន្តែមុនភ្ជួរដីលើកទី៣ ដាក់ជីលាមកគោ និងស្លឹកឈើពុកផុយទ្រាប់បាត ទើបធ្វើការភ្ជួរលុប
- រយៈពេល ៣ ទៅ ៤ថ្ងៃបន្ទាប់ ទើបរាស់បំបែកដី និងកៀរយកស្មៅចេញអោយអស់
- បន្ទាប់មកលើកជារង ដែលរងចេកនីមួយៗ មានទទឹង ៨០ស.ម បណ្តោយតាមស្ថានភាពដី និងកំពស់រងប្រហែល ២០ស.ម ចន្លោះពីរងមួយទៅមួយ កន្លះម៉ែត្រ
- បន្ទាប់មក កាប់រណ្តៅដាំដោយរណ្តៅនីមួយៗមានទំហំ ៥តឹកបួនជ្រុង និងជំរៅ ៥តឹក ហើយដាំក្នុងចន្លោះគុម្ព ១,៨ម៉ែត្រ និងចន្លោះជួរ ១,៨ម៉ែត្រ។
ការដាំដុះចេក
- កាប់រណ្តៅដាំនៅតាមចន្លោះរង ចំងាយពីដើមមួយទៅដើមមួយ ៣ម៉ែត្របួនជ្រុង និងជីករណ្តៅទំហំ កន្លះម៉ែត្របួនជ្រុង ជម្រៅកន្លះម៉ែត្រ
- នៅបាតរណ្តៅ ដាក់សំរាមស្លឹកឈើនៅបាតខាងក្រោម
- បន្ទាប់មកដាក់ អាចម៍គោក្រៀមលាយជាមួយដី រួចទើបដាក់កូនចេកដាំ
- កូនចេកដែលត្រូវដាំ កាត់ធាងចេញខ្លះ ដោយទុកតែ ២-៣ ធាងប៉ុណ្ណោះ ព្រោះ កាលណាខ្យល់បក់ខ្លាំង នាំឲ្យដើមចេកទ្រេត រលើងឫស
- ក្រោយពីដាំហើយ ប្រមូលកំប្លោក សំរាម ចំបើងមកគ្របគល់ចេក ដើម្បីឲ្យត្រជាក់គល់ និងជប់សំណើមបានយូរ
- គេអាចដាំចេកពងមាន់ ដោយដោយយកគល់ចេកទៅដាំក៏បាន ដោយយកគល់ចេកពុះជា២ យកមួយចំណែកដាក់ដាំក្នុងរណ្តៅ ដោយកប់គល់ផ្ងារឡើងលើ
ការថែទាំ
- ក្នុងការថែទាំ ត្រូវយកចិត្តទុកដាក់ស្រោចទឹក ដកស្មៅ ចាប់សត្វល្អិតជាប្រចាំ
- ការស្រោចស្រព ប្រើទុយយោទាញបាញ់ស្រោច លើរងដំណាំដោយក្នុង ១ថ្ងៃស្រោចចំនួន ២ ដងនៅពេលដាំដំបូង ។
- លុះដល់ចេក ចាប់ឫសរឹងមាំ បន្ថយការស្រោចទឹកតែ ១ ថ្ងៃម្តង ព្រោះដោយសារនៅតាម គល់ដំណាំប្រមូលកំប្លោកចំបើង គ្របគល់ដែលធ្វើឲ្យជប់ សំណើមបានយូរ
- ដាក់ជីលាមកគោរៀងរាល់ 10ថ្ងៃម្តង ព្រមទាំងកាត់ស្លឹកដែលងាប់ៗចោល
- ក្នុងចេកមួយគុម្ព ត្រូវរក្សាតែ២ដើមប៉ុណ្ណោះ គឺមេដើម និងកូនចេកដែលថ្លោសល្អជាងគេ១ដើម ក្រៅពីនេះគាស់ ចេញទាំងអស់ ដើម្បីឲ្យចេកទទួលបានទិន្នផលខ្ពស់
- បើធ្វើបែបនេះ ចេក១ស្ទង អាចបានផ្លែ ពី ៨-១០ស្និត
- ចំណែកកូនចេកគាស់ចេញហើយ ជ្រើសរើសដើមល្អៗ យកទៅដាំនៅចន្លោះគុម្ពបន្តទៀត នៅពេលកាប់ ដើមមេចេញ កូនចេកដែលដាក់ដាំបន្តធំតៗគ្នា ហើយអាចទទួលបានផ្លែបន្តបន្ទាប់គ្នា
- ឧស្សាហ៍កាប់ធាង ដែលដុះសាខាចេញ ដើម្បីឲ្យពន្លឺថ្ងៃចាំងចូលបានគ្រាប់គ្រាន់
- បាចទឹកចេញ ពេលមានភ្លៀងធ្លាក់ច្រើន កុំឲ្យដក់ទឹកក្នុងចម្ការ
ការប្រមូលផល
- រយៈពេលដាំ រហូតដល់ទៅ ៧-៨ ខែ ចេកចាប់ផ្លែ
- នៅពេលទម្លាក់ស្និតអស់ យើងត្រូវកាច់ត្រយូងចោល
- ក្រោយពេលចេកទម្លាក់ត្រយ៉ូង រយៈពេល ១ខែ ទៅ១ខែ១០ថ្ងៃ
- មានអាយុសមស្រប ពេលផ្លែលប់ជ្រុងរបស់វា ផ្លែឡើងមូល
- សម្បកផ្លែរបស់វាស្តើងរលោង និងឡើងម្សៅ
- ផ្លែវាចាប់ផ្តើមប្រែពីពណ៌បៃតង ទៅលឿង
ចំណាប់អារម្មណ៍
តាមរយៈអត្ថបទខាងលើនេះ បានបង្ហាញអ្នកទាំងអស់គ្នាពី បច្ចេកទេសដាំដុះ ចេកពងមាន់ ដែលជាឈើ ដែលទទួលបានការពេញនិយម ក្នុងការទទួលទានប្រចាំថ្ងៃ និងការប្រើប្រាស់ សម្រាប់ពិធីផ្សេងៗ ដូច្នេះបើសិនជាលោកអ្នក មានដីទំនេរ មិនដឹងថា ដាំដុះអ្វី អាចសាកល្បងជាមួយ ដំណាំចេកពងមាន់ នេះបាន ក្នុងការជួយបង្កើតមុខរបរ និងបង្កើនប្រាក់ចំណូល របស់អ្នកទាំងអស់គ្នា ព្រោះថា ចេកពងមាន់ នេះវាមានតម្លៃថ្លៃគួរសម្យ ជាពិសេសរដូវចូលឆ្នាំ ដែលបងប្អូនប្រជាពលរដ្ឋយើង ប្រារព្ធជារៀងរាល់ឆ្នាំ។
