បច្ចេកទេសដាំ ឈូកយកគ្រាប់

គ្រាប់ឈូក សម្បូរទៅដោយ វីតាមីនA វីតាមីនC វីតាមីនE ប្រូទីនប្រមាណជា២៣% និងមានសារជាតិរ៉ែ ដែល អាចជួយមប្រុងខួរក្បាល សរសៃប្រសាទ រក្សាអាការឈឺសន្លាក់ បង្កើតគ្រាប់ឈាម ព្រមទាំងជួយទំនុកបម្រុង ឈាមឱ្យមាន ដំណើរការ ល្អផងដែរ ប៉ុន្តែវាមាន ប្រសិទ្ធភាព បានតែចំពោះគ្រាប់ឈូកស្រស់ៗប៉ុណ្ណោះ ចំពោះឈូកដែលបានឆ្លងកាត់ ការចម្អិនឆ្អិន រួចហើយវានឹង​បាត់បង់គុណភាព។ ក្រៅពីនេះវាជួយឱ្យចរន្តឈាម រត់បានល្អ បន្ថយអាការណែនដើមទ្រូង ព្រោះបញ្ហាខ្វះ ឈាមជាដើម-ល-។

ខាងក្រោមជា វិធីក្នុងការដាំដុះដែលអាចជួយអ្នក​ អោយត្រៀមបានត្រឹមត្រូវក្នុងការចាប់ផ្តើមដាំឈូកដើម្បីយកគ្រាប់​៖

ជ្រើសរើសពូជ

ជ្រើសរើសប្រភេទពូជឈូកបាយ ព្រោះពូជនេះបានផលច្រើន និងមានគ្រាប់ណែនជាងពូជឈូកបេងដែលមានផ្កាពណ៌ ដែលមានរយៈពេលដាំ ៦ខែ។

ការរៀបចំដី

• ជ្រើសរើសយកស្រែ ប្រភេទដីបាតភូមិ ព្រោះវាជាដីសម្បូរជីជាតិ
• មុនពេលដាំត្រូវភ្ជួរដី ១ ទៅ ២ដង ដើម្បីកម្ចាត់ស្មៅ
• ពេលភ្ជួររួចហើយ ទុកដីរយៈពេល ៣ ទៅ ៧ថ្ងៃ
• ភ្ជួរលើកទី២ និងរាស់ដីឲ្យរាបស្មើជាការស្រេច
• ក្រោយពីរៀបចំដីរួច ចាំបាច់ត្រូវបញ្ចូលទឹកក្នុងស្រែ ដើម្បីឲ្យងាប់ស្មៅ
• ហើយបន្ទាប់មកទៀត ជ្រើសរើសកូនឈូកណាដែលថ្លោសល្អ មិនយកកូនដែលខ្ចីពេក ឬចាស់ពេក
• ដាំកូនឈូកលើដី ដែលបានរៀបចំនោះ ចន្លោះពីគ្នា៣តឹក

ការថែទាំ

• ក្រោយឈូកដាំបានរយៈពេល ៧ ទៅ ១៥ថ្ងៃ វាចាប់ផ្ដើមដុះសន្លឹកហើយ
• ចាប់ផ្តើមដើរដកស្មៅ ដើម្បីឲ្យឈូកដុះលូតលាស់លឿន
• ក្នុងអំឡុងពេលនេះ ចាំបាច់ត្រូវរក្សាទឹកក្នុងស្រែ មិនឲ្យលើសពី ១ម៉ែត្រនោះឡើយ ដើម្បីការពារសត្វចង្រៃស៊ីស្លឹក ឬដើមឈូក ដែលយើងត្រូវបាញ់ថ្នាំ កំចាត់វា និងការដាក់ជី
• ដំណាំឈូកមានសត្វចង្រៃបំផ្លាញ មួយចំនួនដូចជា សត្វក្រាវាមូលកករឈូក អត់បានផល ពេលខ្លះទៅមានដង្កូវវាគ្រាប់ ខ្យងក៏មកស៊ីទៀត ចឹងវាប្រឈមច្រើន តែខែវស្សាវាមិនសូវប្រឈម តែបើខែប្រាំងវិញវាសម្បូរជាង។

ការប្រមូលផល

ក្រោយពីដាំបានរយៈពេល ៣ខែ ឈូកអាចប្រមូលផលបានបណ្ដើរៗហើយ។