ដើម្បីទទួលបានជោគជ័យ ក្នុងការចិញ្ចឹមមាន់ ឆាប់ធំ កត្តាផ្តល់ចំណី មានសារៈសំខាន់ណាស់ ក្នុងការងារផលិត កម្មសត្វ។ ក្នុងការចិញ្ចឹមាន់ ការផ្តល់ចំណីមាន់ដែលមានគុណភាពល្អ ជួយឲ្យមាន់មានសុខភាពល្អ និងធំធាត់លឿន។ តាមតម្រូវការជីវជាតិ មាន់ត្រូវការចំណី ៤ ក្រុមសំខាន់ៗ ដូចជា ចំណីថាមពល ចំណីជាតិសាច់ ចំណីវីតាមីន និងចំណី ជាតិរ៉ែ។ ការផ្សំចំណីដែលមានតុល្យភាពនៃក្រុមខាងលើ គឺជួយអោយមាន់មានសុខភាពល្អ និងលូតលាស់លឿន ។

ដើម្បីជ្រាបកាន់តែច្បាស់ អត្ថបទខាងក្រោម និងបង្ហាញលោកអ្នក ពីវិធីសាស្រ្ត ក្នុងការផលិតចំណីដោយខ្លួនឯង សម្រាប់ ការចិញ្ចឹម មាន់ស្រែ ដូចខាងក្រោម៖

ប្រភពចំណី

• ចំណីថាមពល៖

មាន់ត្រូវការចំណីថាមពល សម្រាប់ផ្តល់កម្លាំង ក្នុងការធ្វើចលនារំលាយអាហារ និងកត្តារស់នៅដទៃទៀត។ ប្រភេទចំណីថាមពលសំខាន់ៗរួមមាន៖ ពោត កន្ទក់ ស្រូវ ដំឡូង ចុងអង្គរ

• ចំណីប្រូតេអីន៖

វាជាប្រភេទចំណី ដែលត្រូវការសម្រាប់បង្កើតសាច់ ធ្វើអោយមាន់ឆាប់ធំធាត់ និងមានសាច់ច្រើន។ គំរូនៃប្រភេទចំណីនេះមាន៖កូនត្រី កំពឹស កណ្តូប សណ្តែកសៀង ចង្រិត ក្តាម ជន្លេន កណ្ដៀរ

• ចំណីវីតាមីន៖

មាន់ត្រូវការចំណីវីតាមីន ដើម្បីបំពេញនូវមុខងារសរីរាង្គ។ មានចំណីវីតាមីនជាច្រើនប្រភេទ ងាយស្រួលរក បាន ដូចជា៖  សណ្តែកបណ្តុះ ផ្ទី ត្រកូន ត្រឡាច ល្ពៅ

• ចំណីជាតិរ៉ែ៖

ជួយឲ្យឆ្អឹងរឹងមាំ បង្កើតសំបកពង និងរក្សាលំនឹងក្នុងខ្លួនសត្វ។ ចំណីប្រភេទនេះ អាចរកបាន ដោយងាយ ដូចបង្ហាញខាងក្រោម៖ អំបិល សំបកខ្យង ឬខ្ចៅ បុកវាឲ្យម៉ត់

របៀបផ្សំចំណី

• ចំណីសម្រេច ឬចំណីលក់នៅទីផ្សារ មានតម្លៃថ្លៃ ណាស់ ។
• ដើម្បីកាត់បន្ថយចំណាយលើចំណី កសិករ អាចផ្សំចំណី ដែលអាចរកបានក្នុងបរិមាណច្រើន ដូច ជា ស្រូវ កន្ទក់ ចុងអង្ករ ពោត និងសណ្តែក ដោយ លាយ ជាមួយចំណីសម្រេចក្នុងបរិមាណសមស្រប។
• សម្រាប់កូនមាន់ ដែលមានអាយុតិចជាង ៣០ថ្ងៃ កសិករគួរផ្តល់ចំណីសម្រេចអោយស៊ីតែម្តង ពីព្រោះវាធ្វើអោយកូនមាន់រឹងមាំ និងធំធាត់លឿន

ចំណីកូនមាន់ (អាយុតិចជាង ៣០ថ្ងៃ)

• កូនមាន់ដែលទើបទំលាក់ពីសំបុក រហូតដល់ ៣០ថ្ងៃ គួរផ្តល់ចំណីសម្រេច (ដោយមិនចាំបាច់ផ្សំ ជាមួយ ចំណិដទៃទៀត)
• កូនមាន់អាយុតិចជាង ៣០ថ្ងៃ ១ក្បាលស៊ីចំណីប្រមាណ ២៥ ក្រាម ក្នុង ១ថ្ងៃ ដូច្នេះកូនមាន់ ១០ក្បាល ស៊ីចំណីប្រមាណ ២៥០ក្រាម (២ខាំ កន្លះ) ក្នុង ១ថ្ងៃ
• កូនមាន់គួរផ្តល់ចំណី ៣ ទៅ ៤ ដង ក្នុង ១ថ្ងៃ

ចំណីមាន់ជំទង់ (អាយុ ៣០ – ៦០ថ្ងៃ)

• មាន់ជំទង់ គួរផ្តល់ចំណីសម្រេចត្រឹមតែ ៣០%
• លាយជាមួយវត្ថុធាតុដើមចំណី ក្នុងស្រុក ៧០% ដូចជា កន្ទក់ ចុងអង្ករ ស្រូវ ពោត ចំណឺវីតាមីន (ស្មៅ ត្រកូន ឬ ចក) និងចំណីជាតិរ៉ែ
• ចំណីវីតាមីន (ត្រកួន និងរុក្ខជាតិបៃតងដទៃទៀត) គួរលាយត្រឹមតែ ២០% ជាមួយចំណីសម្រេច
• មាន់ជំទង់ ១ក្បាល ស៊ីចំណីផ្សំប្រមាណ ៦០ក្រាម ក្នុង ១ថ្ងៃ ដូច្នេះមាន់ជំទង់ ១០ក្បាល ត្រូវការ ចំណី ប្រមាណ ០.៦គ.ក្រ ក្នុង ១ថ្ងៃ។
• គួរផ្តល់ចំណី ២ ទៅ ៣ដង ក្នុង ១ថ្ងៃ

ចំណីមាន់ធំ (អាយុ ៦០ថ្ងៃ-១២០ថ្ងៃ)

• មាន់ធំ គួរផ្តល់ចំណីសម្រេចប្រមាណ ៣០% និង ៧០% នៃចំណីរកបាន ដូចជា ស្រូវ ចុងអង្ករ កន្ទក់ ពោត ចំណីវីតាមីន និងចំណីជាតិរ៉ែ។
• ចំណឺវីតាមីន (ស្មៅ ត្រកូន ឬ ចក) គួរលាយត្រឹមតែ ២០% ជា មួយចំណីសម្រេច និងចំណីដទៃទៀត។
• មាន់ធំ ស៊ីចំណីផ្សំប្រមាណ ១២០ក្រាម ក្នុង ១ថ្ងៃ ដូច្នេះ មាន់ធំ ១០ក្បាល ត្រូវការចំណីផ្សំ ១.២គ.ក្រ ក្នុង ១ថ្ងៃ
• គួរផ្តល់ចំណីផ្សំ ២ ទៅ ៣ដង ក្នុង ១ថ្ងៃ
• មាន់ធំ អាចផ្តល់ចំណីដែលកសិករអាចរកបានសុទ្ធ ដូចជាចំណីថាមពល ជាតិសាច់ វីតាមីន និងចំណី ជាតិរ៉ែ ដោយផ្សំចូលគ្នា និងបរិមាណគ្រប់គ្រាន់។

ចំណីមាន់មេបា (អាយុចាប់ពី ១២០ថ្ងៃឡើង)

• ជាធម្មតា កសិករអាចលក់មាន់ចាប់ពីអាយុ ១២០ថ្ងៃ (៤ខែ) ឡើង។
• ប៉ុន្តែ មាន់មួយចំនួន ត្រូវរក្សាទុកដើម្បី ធ្វើមេបន្ត ឬប្តូរមេចាស់ចេញ។
• ជាទូទៅ មាន់មេ អាចផ្តល់ពង ចាប់ពីអាយុ ១៨០ថ្ងៃឡើង។
• មាន់មេបា គួរផ្តល់ចំណីដូចមាន់ជំទង់ និងមាន់ធំដែរ ពោលគឺលាយចំណីសម្រេច ៣០% ជាមួយចំណី រកបាន ប្រមាណ ៧០%ទៀត។
• មាន់មេបា ១០ ក្បាល ស៊ីចំណីផ្សំ ១.៥គ.ក្រ ក្នុង ១ថ្ងៃ
• ការផ្តល់ចំណ៌ជាតិរ៉ែ និងវីតាមីន មានសារៈសំខាន់ណាស់ សម្រាប់មាន់បង្កាត់ពូជ និងកំពុងផ្តល់ពង

សម្ភារៈ សម្រាប់ផ្តល់ចំណី

• សម្ភារៈដាក់ចំណីសមស្រប និងការសំអាត គឺជាកត្តាសំខាន់ ក្នុងការចិញ្ចឹមមាន់។
• ការផ្តល់ចំណី ជាមួយ នឹងសម្ភារៈស្អាត អាចជួយកាត់បន្ថយការឆ្លងបរាសិតផ្សេងៗ។
• សម្ភារៈដាក់ចំណីសមស្រប អាចជួយឲ្យ មាន់ងាយស្រួលស៊ី និងធ្វើឲ្យចំណីមានអនាម័យល្អ ពេលមាន់ស៊ី។
• សម្ភារៈដាក់ចំណី អាចធ្វើបាន ដោយប្រើប្រាស់របស់ផ្សេងៗដែលមានស្រាប់ ដូចជា ឬស្សី សំបកកង់ឡានចាស់ៗ ធុងជ័រ ជាដើម

ការផ្តល់ទឹក

• ត្រូវផ្តល់ទឹកស្អាត សម្រាប់កូនមាន់ និងមាន់ធំ អោយមានជាប្រចាំក្នុងរយៈពេល ២៤ម៉ោង
• មាន់ជំទង់ ឬមាន់មេបា ១០០ក្បាល ផឹកទឹកប្រមាណ៤លីត្រក្នុង១ថ្ងៃ (អាចប្រែប្រួលតាមអាកាសធាតុ) ការផ្តល់ទឹកស្អាត និងសំអាតប្លុកទឹកជាប្រចាំ អាចជួយអោយមាន់មានសុខភាពល្អ និងមិនឆ្លងបរាសិត ផ្សេងៗ។
• ស្នូកទឹកត្រឹមត្រូវ ធ្វើអោយមាន់ងាយស្រួលផឹកទឹក និងធ្វើអោយទឹកមិនកខ្វក់
• ស្នូកទឹក អាចធ្វើ ពីរបស់មានស្រាប់ ដូចជា ដើមឬស្សី ដប/ធុងជ័រ និងរបស់ដទៃទៀត

តាមរយៈអត្ថបទខាងលើនេះ មានប្រយោជន៍ណាស់ សម្រាប់អ្នកដែលស្រលាញ់សត្វ  ចង់ចិញ្ចឹមសត្វ ក៏ដូចជា ចង់ចិញ្ចឹមមាន់​ស្រែ​ដោយខ្លួនឯង អាចមើលពីបច្ចេកទេសសាមញ្ញៗ ដើម្បីផ្តល់ចំណីឲ្យមាន់ឆាប់ធំធាត់ ដោយផ្សំ ចំណីដោយខ្លួនឯង  ចំណាយតិច ។ ការចិញ្ចឹមមាន់ស្រែ ជាលក្ខណៈគ្រួសារ អាចជួយផ្គត់ផ្គង ការហូបចុកប្រចាំថ្ងៃ និងជាមុខរបរមួយ ជួយបង្កើតឳកាសការងារ និងបង្កើន​ប្រាក់ចំណូលសម្រាប់គ្រួសារបានមួយផ្នែក។

សូមអរគុណ ចំពោះការ Like  សូមជួយ Share ចែករំលែក អត្ថបទខាងលើនេះបន្ត ដើម្បីគាំទ្រគេហទំព័រ Farmer DNA របស់យើង ប្រសិនបើលោកអ្នក មានចំងល់ ឬចង់ដឹងពី ព័ត៌មានបន្ថែម ឬបច្ចេកទេសល្អៗ ថ្មីៗ សូមខមិនខាងក្រោម យើងខ្ញុំនិងស្វែងរក ចំណេះ​ដឹងល្អៗ ថ្មីៗ ពាក់ព័ន្ធ នឹងវិស័យកសិម្ម មកចែកជូនអ្នកទាំងអស់គ្នាបន្តទៀត!