ការចិញ្ចឹមជ្រូករបស់ បងប្អូនប្រជាកសិករ ទទួលជោគជ័យ យើងខ្ញុំបានដកស្រង់នូវបច្ចេកទេស ក្នុងការចិញ្ចឹមជ្រូកបា សម្រាប់ បង្កាត់ពូជ មកចែករំលែក ជាចំណេះដឹងក្នុងការអនុវត្ត ការថែទាំ ដើម្បីទទួលបាន ជ្រូកបាដែលមានសុខភាពល្អ ផ្តល់ទឹកកាមបានច្រើន និង មានគុណភាពល្អ។
សូមតាមដាន ពីបច្ចេកទេស ក្នុងការចិញ្ចឹមជ្រូកបាដូចខាងក្រោម៖
ការជ្រើសរើសជ្រូកបា
ជ្រូកបា មានសារៈសំខាន់ណាស់ សម្រាប់ផលិតកម្មជ្រូក ព្រោះជ្រូកបា ១ក្បាល អាចយកបង្កាត់ ជាមួយមេជ្រូកបានច្រើនក្បាល៖
- ជ្រើសរើសយក កូនជ្រូក ចេញពីជ្រូកមេ-បា មានសុខភាពល្អ និងមានប្រភពច្បាស់លាស់
- កូនកើតចេញពីមេជ្រូក ជាកូនក្នុងសំបុកមានកម្លាំងមាំមួន
- មេរបស់វា ជាមេដែលមានកូនច្រើន និងមានដោះមិនតិចជាង១២ ឬ៦គូ
- មានសុខភាពល្អ ជើងត្រង់ល្អ រឹងមាំ ក្រចកស្មើ ធំធាត់លឿន
- ប្រដាប់បន្តពូជល្អ ពងស្វាសទាំងគូស្មើគ្នា
- ស្បែករលោង ស្មាទូលាយ ខ្នងត្រង់ ទ្រូងបើក
- រហ័សរហួន មិនរើសចំណី
- មិនដែលកើតជំងឺឆ្លងណាមួយ
- មានអាយុ ចាប់ពី ៤៥ថ្ងៃឡើង និងមានទម្ងន់ ចាប់ពី ៥-៧គ.ក្រ
ពូជជ្រូក
ពូជជ្រូកយ៉កសៀរ(Yorkshire)៖
- ពូជនេះ មានមាឌធំ ខ្លួនវែងធំស្មើពីស្មាដល់គូថ ស្រលះល្អ
- ដំណើររវៀសរវៃ មានរោមទន់ពណ៌ស
- ត្រចៀកត្រង់ឈរ ហើយរាងធ្លាក់ខុបបន្តិច
- ក្បាលធំ ថ្ងាសទូលាយ មាត់រាងខើចទៅលើ ភ្នែកវៃ
- ខ្នងត្រង់ទូលាយ ភ្លៅធំវែង ជើងវែងមាំ
- ពូជនេះពូកែចិញ្ចឹមកូន សាយកូន កូនច្រើន ពី១០-១២
- សាច់ច្រើន កំនើនទម្ងន់ ០,៧-០,៨ គ.ក្រ/ថ្ងៃ
- ចិញ្ចឹមរយៈពេល ៥-៦ខែ បានទម្ងន់ ៩៥-១០០គ.ក្រ
ពូជជ្រូកហំសៀរ(Hampshire)៖
- មានមាឌល្មម រហ័សរហួន
- សាច់ក្រហមច្រើន
- មានមុខត្រង់វែង
- ពូជសុទ្ធ ពណ៌ខ្មៅ ស ពាក់ក្រវ៉ាត់
- ត្រចៀកឈរប៉ះ ជើងខ្លី និងសាយកូន
ពូជជ្រូកឡែនដ្រេស(Landrace)៖
- ពូជជ្រូកផ្តល់ សាច់ក្រហមច្រើន
- មានរោមពណ៌ស ខ្លួនវែង ក្បាលតូច ថ្ងាសតូច ស្លឹកត្រចៀកធំ ធ្លាក់គ្របភ្នែកទាំង២
- ខ្លួនវែងត្រង់ ជើងទាំងបួន តូច តែរក្សាជំហបានល្អ
- សាយកូន ពី ១០-១១ក្បាល/សំបុកឬសារ
- កូនកើតមកមានទំហំស្មើៗគ្នា
- ស្លូត ធន់នឹងអាកាសធាតុ
ពូជជ្រូកភីទ្រៀន(Pietrain)៖
- ពណ៌ប៉ារា ឬខ្លាឃ្លោក
- ស្លឹកត្រចៀកប៉ះឡើង
- សាយកូន ១០-១២ក្បាល/សំបុកឬសារ
- ឆ្អឹងតូច សាច់ច្រើន
ពូជជ្រូកឌុយរ៉ុក(Duroc)៖
- មានមាឌធំ រហ័សរហួន មានពណ៌ត្នោតចាស់ឬខ្ចី
- ជើងវែង ធន់នឹងជំងឺ
- អត្រាសាច់ក្រហមច្រើន
- ត្រចៀកធ្លាក់បន្តិចទៅមុខ
- សាយកូនមានពី ៩-១០ក្បាល/សំបុកឬសារ
- គេច្រើនយកវា ទៅបង្កាត់ជាមួយពូជដទៃទៀត ដើម្បីបានសាច់ក្រហមច្រើន ហើយកូនឆាប់ធំ
ការសង់ទ្រុងជ្រូកបា
- សង់ទ្រុង បណ្តោយថ្ងៃ
- គួររៀបចំទ្រុង ឲ្យមានសីតុណ្ហភាព ក្នុងទ្រុង ត្រឹមតែ ២៥-២៨°C
- ដាក់ទែម៉ូម៉ែត្រ ក្នុងរោង ដើម្បីតាមដានសីតុណ្ហភាព
- គួរមានជញ្ជាំងត្រជាក់ ឬកង្ហារបក់ខ្យល់ ដើម្បីឲ្យទ្រុងមានសីតុណ្ហភាពត្រជាក់
- ដំបូលទ្រុង អាចជាស្បូវ ស្លឹកត្នោត ស័ង្កសី ក្បឿង
- កំរាលទ្រុង ធ្វើពីស៊ីម៉ង់ត៍ តែមិនឲ្យរលោងពេក ចៀសវាងការរអិល
- កំរាលទេ ទៅក្រោយ ងាយស្រួលក្នុងការសម្អាត និងមានកន្លែងបង្ហូរលាមកចេញពីទ្រុង
ទំហំទ្រុងជ្រូកបា
- ជ្រូកបាមានកន្លែងបង្កាត់ ទំហំទ្រុង ២,២-២,៣ X ៤ម៉ែត្រ កម្ពស់ទ្វារ ១-១,៥ម៉ែត្រ
ការផ្តល់ចំណីនិងទឹក
ការផ្តល់ចំណី៖
- ជ្រូកបា ត្រូវការចំណី ២,៥-៣ គ.ក្រ អោយចំណី ២ដង/ថ្ងៃ បន្ទាប់ពីប្រមូលស្ពែមរួច
- ចំណីត្រូវ ផ្តល់ប្រូតេអីនខ្ពស់ ដូចជាចំណីជ្រូកបំបៅកូន អាស្រ័យតាមរូបរាងជ្រូកបា
- ត្រូវបន្ថែមអាស៊ីតអាមីនេ និងប្រេម៉ិច ប្រសិនបើទឹកកាម មានភាពមិនប្រក្រតី ក្នុងដំណើរការផលិតទឹកកាម
- ចំណីជ្រូកបា ដូចចំណីជ្រូកមេផើមដែរ
ការផ្តល់ចំណីបន្ថែម៖
- ការផលិតទឹកកាម ត្រូវការប្រូតែអីនខ្ពស់ និងអាស៊ីតអាមីនេខ្ពស់
- បន្ថែម លីស៊ីន ផ្តល់ឲ្យវាស៊ី ៧ថ្ងៃ/ខែ
- បន្ថែមវីតាមីន សេ ក្នុងចំណីឲ្យជ្រូកបាស៊ី បរិមាណ ១ក្រាមរៀងរាល់ថ្ងៃ ដើម្បីបង្កើនគុណភាពទឹកកាម
បរិមាណចំណីផ្តល់ឲ្យស៊ី៖
- ជ្រូកបា ទម្ងន់ស្រាលជាង ១៥៩ គ.ក្រ ផ្តល់ចំណី ២,០ គ.ក្រ/ថ្ងៃ
- ជ្រូកបា ទម្ងន់ ១៥៩ គ.ក្រ ផ្តល់ចំណី ២,៥ គ.ក្រ/ថ្ងៃ
- ជ្រូកបា ទម្ងន់ ២០៥ គ.ក្រ ផ្តល់ចំណី ២,៧ គ.ក្រ/ថ្ងៃ
- ជ្រូកបា ទម្ងន់ ២៥០ គ.ក្រ ផ្តល់ចំណី ៣,០ គ.ក្រ/ថ្ងៃ
- ជ្រូកបា ទម្ងន់ ២៩៥ គ.ក្រ ផ្តល់ចំណី ៣,៣ គ.ក្រ/ថ្ងៃ
- ជ្រូកបា ទម្ងន់ ៣៤១ គ.ក្រ ផ្តល់ចំណី ៣,៥ គ.ក្រ/ថ្ងៃ
ការផ្តល់ទឹក៖
- ជ្រូកបា ត្រូវការទឹក ១៥-២០ លីត្រ/ក្បាល/ថ្ងៃ
ការថែទាំ និងការធ្វើអនាម័យ
- ត្រួតពិនិត្យសុខភាព ២ដង/ថ្ងៃ ស្ទង់កម្តៅខ្លួនជ្រូក ដោយទែម៉ូម៉ែត្រ
- ក្រោយដាក់ចំណី ត្រូវលាងសម្អាតទ្រុង ២-៣ដងចំ/ថ្ងៃ ផឹកទឹកដោយសេរី
- ត្រូវប្រាកដថាជ្រូកបា មានសុខភាពល្អ ព្រោះទឹកកាមជ្រូកបា បង្កាត់ជាមួយមេជ្រូកច្រើន
- ពិនិត្យការស៊ីចំណី និងអាកប្បកិរិយានៃការបញ្ចេញទឹកកាម របស់ជ្រូកបា
- ចាក់ថ្នាំការពារដល់ ជ្រូកបាឲ្យបានទៀងទាត់
- ត្រួតពិនិត្យ សុខភាពជ្រូកបា ជាប្រចាំ មិនត្រូវបង្ខំ បង្កាត់ពូជ ពេលជ្រូកបាសុខភាពមិនល្អ
- សម្ភារបង្កាត់ពូជ ត្រូវសម្លាប់មេរោគជាមុន មុនពេលយកមកប្រើ
- ក្នុងទ្រុង ត្រូវស្អាត ស្ងួត និងមានអនាម័យជាប្រចាំ
- ត្រូវធ្វើរបង មិនអនុញ្ញាតិ ឲ្យអ្នកក្រៅ ចេញចូលប៉ះពាល់ជ្រូកបាឡើយ
- ចំពោះអ្នកដែល ដើរបង្កាត់ជ្រូកច្រើនកន្លែង ត្រូវងូតទឹក សម្អាតខ្លួន ស្លៀកពាក់សំលៀកបំពាក់កសិដ្ឋាន និងជ្រលក់ជើង ក្នុងទឹកថ្នាំសម្លាប់មេរោគ
- វិធានការអនាម័យ ដោយព័ទ្ធរបងជុំវិញ
កម្មវិធីវ៉ាក់សាំងនិងចាក់ថ្នាំបង្ការ
ការចាក់វ៉ាក់សាំង សម្រាប់ជ្រូកបា មានសារៈសំខាន់ណាស់ ដើម្បីធានាបា សុខភាព និងទឹកកាមរបស់វា។ ត្រូវអនុវត្តកម្មវិធី វ៉ាក់សាំង ឲ្យបានខ្ជាប់ខ្ជួន។ ជ្រូកបា ត្រូវធ្វើវ៉ាក់សាំង ២ដង/ឆ្នាំ ដូចជា៖
- អុតក្តាម បាក្មេង ឬចាស់
- អូហ្សេសស្គី បាក្មេង ឬចាស់
- ប៉េស្ត បាក្មេង ឬចាស់
- កញ្ជ្រិលរលូត មេក្រុំ បា អាយុ៦-៧ខែ អាស្រ័យពូជ
- ត្រូវអនុវត្ត នៅពេលជ្រូកមានអាយុចាប់ពី ៦ខែឡើង
- ការទំលាក់សត្វល្អិត (ព្រូន) ធ្វើរៀងរាល់៦ខែម្តង
ចំណាប់អារម្មណ៍
តាមរយៈអត្ថបទខាងលើនេះ មានប្រយោជន៍ណាស់ សម្រាប់អ្នកដែលស្រលាញ់សត្វ ចង់ចិញ្ចឹមសត្វ ក៏ដូចជាចង់ចិញ្ចឹមជ្រូកបាដោយខ្លួនឯង អាចមើលពី បច្ចេកទេស ការជ្រើសរើសជ្រូកបា ការថែទាំជ្រូកបា ការផ្តល់ចំណីជ្រូកបា ការតាមដានលូតលាស់ល្អ និងការគ្រប់គ្រងការផលិតទឹកកាមរបស់ជ្រូកបា ដើម្បីធានាការបង្កាត់ពូជទទួលបានជោគជ័យល្អ។
ការចិញ្ចឹមជ្រូកបា ទទួលបានប្រាក់ចំណូលច្រើន សម្រាប់ផ្គត់ផ្គង់គ្រួសារ បងប្អូនអាចស្វែងយល់ពីបច្ចេកចិញ្ចឹម ឲ្យបានល្អ ដើម្បីយកមកអនុវត្ត ឲ្យទទួលបានប្រសិទ្ធភាពខ្ពស់។
