សារៈប្រយោជន៍នៃ ទឹកនោមទន្សាយ ក្នុងដំណាំ

យើងតែងជួបប្រទះ បញ្ហាចំបង ២ យ៉ាង ក្នុងការដាំដុះបន្លែបង្ការ ដីខ្វះជីជាតិ និងមានសត្វល្អិត បំផ្លាញដំណាំរបស់យើង ហើយអ្វីដែលយើងកត់សម្គាល់នោះគឺ យើងត្រូវចំណាយលុយច្រើនក្នុងការទិញជី និងថ្នាំសម្លាប់សត្វល្អិត ដែលមានលក់លើទីផ្សារមកប្រើ ដែលសឹងតែថ្លៃជាងតម្លៃរបស់ដំណាំយើងទៅទៀត ។

តើអ្នកបានដឹងទេ ថាកសិករនៅទ្វិបអាហ្វ្រិក គេប្រើ ទឹកនោមទន្សាយ ធ្វើជាជីស្រោចដំណាំ និងដេញសត្វល្អិត ?

ទឹកនោមទន្សាយ សម្រាប់ដេញសត្វល្អិត លើដំណាំ

ដោយសារក្លិនឆ្អេះ នៃទឹកនោម ទន្សាយ វាអាចប្រើជាថ្នាំដេញសត្វល្អិតបាន។ ក្លិនឆ្អេះនេះ ជួយបណ្តេញសត្វល្អិត តែវាមិនសម្លាប់សត្វល្អិតទេ នេះជារឿងប្រសើរព្រោះ សត្វល្អិតខ្លះមានប្រយោជន៍ដល់រុក្ខជាតិដ៏ទៃទៀត។

មិនដូចថ្នាំសំលាប់សត្វល្អិត ដែលសម្លាប់សត្វល្អិតបែបនេះទេ ទឹកនោមទន្សាយគ្រាន់តែបណ្តេញពួកវាប៉ុណ្ណោះ។

ទឹកនោមទន្សាយ ប្រើជាជីធម្មជាតិ លើដំណាំ

ដោយសារតែកំហាប់ អាសូតខ្ពស់នៅក្នុង ទឹកនោមទន្សាយ វាអាចប្រើជាជីសរីរាង្គ។ ដូចគ្នានេះផងដែរ កំហាប់ខ្ពស់នៃអាសូត ផូស្វ័រ និងប៉ូតាស្យូម ធ្វើឱ្យវាក្លាយជាជីសរីរាង្គដ៏ល្អ។

ទន្សាយ ជាសត្វដែលយើងដឹងថាកម្រផឹកទឹក ដូច្នេះមានកម្រិត អាសូត ក្នុងទឹកនោមរបស់វា ជាធម្មតាខ្ពស់។ អាសូត មានសារៈសំខាន់ខ្លាំងណាស់ ក្នុងអំឡុងពេលធ្វើរស្មីសំយោគ និងជាសមាសធាតុសំខាន់នៃក្លរ៉ូហ្វីល។ អ្នកអាចប្រើស្រោច ទឹកនោមទន្សាយ នៅគល់របស់រុក្ខជាតិបាន។

ទឹកនោមទន្សាយមានសារធាតុចិញ្ចឹមដូចខាងក្រោម៖

អាសូត – 4% អាសូត គឺជាសមាសធាតុ សំខាន់នៃក្លរ៉ូហ្វីល ដែលត្រូវបានបង្កើតឡើងកំឡុងពេល ធ្វើរស្មីសំយោគ។
ផូស្វ័រ – 2,8% ផូស្វ័រមានសារៈសំខាន់ ចំពោះរុក្ខជាតិក្នុងការ បែងចែកកោសិកា ការបង្កើតជាលិកាថ្មី និងការពន្លឿនការពេញវ័យ។
ប៉ូតាស្យូម – 1.67% វាត្រូវការជាចម្បងជួយដល់ ការលូតលាស់ឫស និងបង្កើនភាពធន់ នឹងអាកាសធាតុរាំងស្ងួត។

គន្លឹះខាងលើជួយអ្នកអោយ ដឹងពីប្រភពនៃជីធម្មជាតិ ដែលអ្នកអាចកាត់បន្ថយថ្លៃដើម ក្នុងការដាំណាំរបស់អ្នក និងវាជួយដល់បរិស្ថានជុំវិញខ្លួនរបស់យើងទាំងងស់គ្នាផងដែរ សូមតាមដានអត្ថបទក្រោយៗ យើងនឹងបង្ហាញពីវិធីចិញ្ចឹមទន្សាយ និងការប្រមូលទឹកនោមរបស់ទន្សាយបន្ថែមទៀត ។